Ilat Tanpa Balung
Basa Jawa kuwi
satunggaling basa kang nduweni kasusastran akeh. Tembung kasusastran kadadean
saka tembung susastra kang antuk ater-ater ka- lan panambang -an. Dene tembung
susastra dhewe mono sejatine kadadean saka rong tembung yaiku tembung su lan
sastra. Su nduweni teges apik, endah, utawa becik, lan sastra kuwi tegese
sastra utawa basa. Dadi kang kinaran kasusastran yaiku sastra utawa basa kang
ujude endah, jinise kasusastran kuwi werna-werna, kayata bebasan, paribasan,
tembung saroja, tembung saloka, tembung garba, cangkriman, wangsalan, lan
liya-liyane.
Wong Jawa kuwi anggone
ngrasa kanthi digalih, utawa teges liyane mono anggone ngomong utawa ngarani nora
asipat blaka. Dadi ya nganggo basa pepindhan utawa kasusastran mau. Menawa kang
diajak guneman kuwi padha-padha wong Jawane, kudune paham karo apa kang
dikarepake dening wong kang guneman mau. Tuladhane, simbok ngendika “Le, kowe
kuwi dakceluki kaet mau kok njangan gori wae.” pangandikan kuwi mau menawa
ditegesake kanthi blaka temtu nora temu ing nalar, jenenge diceluki kok tekan
jangan gori barang. Menawa kang nampa guneman kuwi mau dudu wong Jawa lak ya
mesti bakal slenco lan nora paham karo apa kang sejatine dikarepake. Nanging
beda umpama kang nampa guneman kuwi mau wong Jawa. Jangan kang digawe saka gori
kuwi jenenge gudheg. Dadi karepe simbok kuwi mau kok mbudhegi yen diceluki.
Anggone simbok ngendika lak ya nora blaka alias
nganggo basa endah ta? Kuwi mau tuladha salah siji jinise kasusastran kang
kinaran wangsalan, yaiku tetembungan kang ngemot satunggaling batangan, nanging
batangane wus ana senajan mung sakwanda utawa nora melok.
Kajaba kuwi, ana sijine
tuladha kasusastran kang nduweni teges apik banget, yaiku paribasan “ilat tanpa
balung”. Pancen bener menawa ujud ilat kang sejati kuwi tanpa balung, nanging
kang dikarepake paribasan kuwi mono pitutur kanggo manungsa aja sok seneng mencla-mencle
utawa ngomong sak penake dhewe kang bisa natoni atine liyan.
Uga ana satunggaling
paribasan apik ing basa Indonesia kang ana gayutane karo babagan omong, yaiku bicaralah yang baik, apabila tidak dapat
berbicara secara baik maka lebih baik diam. Paribasan kuwi prasasat ngemu
teges kang jero banget. Paribasan kuwi nggambarake kaya ngapa pentinge omongan
menawa wus ucul saka tuturan. Wong omongan kuwi nora kaya nulis ing satunggaling
kertas utawa ngetik ing jerone laptop, kang tegese mono tulisan kuwi isih bisa
dibusak lan diganti menawa kleru.
Omongan kuwi menawa wus
ucul saka tuturan, padha kaya paku kang wus tumancep ing satunggaling kayu.
Angel dijupuk maneh. Pancen iya isih bisa dicabut, nanging tetep gawe tatu ing
kayu kang nora kena ditambal kaya nalika isih utuh. Semana uga manungsa menawa
pisan wae ngomong utawa nyacat kang nganti gawe tatuning ati, tekan pati nora
bakal bisa lali. Arepa wus njaluk ngapura, mesti isih tetep nilas ing ati lan
isih kelingan. Mulane kudu ati-ati menawa ngomong.
Ilat kuwi pranyata bisa
nemtokake beja lan cilakane uwong, embuh ing donya, apa dene ing akherat
mbesuk. Menawa uwong bisa njaga omongane lan bisa ngomong kanthi apik, temtu
lak ya bakal beja kanggo awake dhewe. Dene kosok walike menawa senenge mung
ngomong ala, misuh, utawa nyatur wong liya, temtu ya bakal ndadekake cilakane
awake dhewe. Wong kang senenge ngomong ala utawa nyacat wong liya, bisa gawe
bubrahe silaturahmi lan sesrawungan ing masarakat.
Kisahe Malin Kundhang
kang dikutuk dening simboke kae uga namung prekara omongan, kang sipate mono
nora ngajeni wong tuwa nganti gawe laraning atine simbok. Banjur simboke ngutuk
Malin Kundhang dadi watu. Menawa wus dadi watu lak ya nora bisa dadi uwong
meneh ta? Kaya ngono kuwi ampuhe omongan. Apa maneh omongan kang metu saka
tuturane simbok, bisa nguwalati, amarga ridhaning Gusti gumantung ridhaning
wong tuwa utamane simbok.
Ana maneh cerita satunggaling
pelawak kang kondhang ing Indonesia, kang kaancem karire mung gara-gara anggone ngomong kulina sak penake dhewe
nganti gawe lara atine wong liya. Pancen niyate pelawak kuwi mono mesti lak ya
mung guyon, nanging pranyata panampane wong liya kuwi durung mesthi apik. Mula
ta mula, anggone nggunakake ilat kang tanpa balung kuwi kudu sing ngati-ati
tenan. Aja nganti salah ngomong, amarga nganti prekara kuwi kadadean, awake
dhewe sing bakal cilaka.
Banjur prekara ilat
tanpa balung kang gampang diolak-alik anggone ngomong, aja gampang ngumbar
janji utawa seneng ngapusi marang liyan, amarga cidra ing janji lan diprecaya
malah ngapusi mono kalebu sipate para munafik. Sipat mangkono kuwi sipat kang
paling nora disenengi dening Gusti. Kuwi mengko urusane ing akherat.
Dening :
Wahyu Sulistiyaningsih
Pendidikan Bahasa Jawa FKIP UNS
Komunitas PULPEN IJO Surakarta
Komentar
Posting Komentar