Molen dening Wahyu Sulistiyaningsih
Pernah diterbitkan Majalah Mingguan Panjebar Semangat Edisi 28 Desember 2013
“Bapak,
meluuuu..” bengoke Alip marang bapake kang lagi mlaku ing dalan arep mangkat
kerja bakti. Bapak noleh ing buri ya namung mesem krungu anake mbengok. Alip
mlayu nututi bapake. “Kok dengaren arep melu bapak kerja bakti thole cah bagus?
Mengko kowe kesel hlo.” Ature bapak sinambi mesem. Alip kang isih ngos-ngosan
mung isa ngelek idu cenggelukan karo nyoba ngomong “Po po pokoke melu bapak.”
Bapak ora bisa nglarang anake melu kerja bakti “Yo wis cah bagus, entuk melu
tapi ra oleh nakal hlo ya,” bapak nggoda Alip. “Siap komandan!” jawabe Alip
kemaki.
Dina
minggu warga kampunge Alip kerja bakti ngecor dalan, “Iki hlo le, sing jenenge
molen.” bapak nduduhi Alip mesin kang kanggo ngudhak jenangan pasir. Alip rada
bingung merga lagi weruh pisan kuwi. Tapi Alip ya manthuk-manthuk. “Woooo.. iya
pak.” Kabeh warga dha nyandhak gaweyan dhewe-dhewe, padha semangat nyambut gawe
ngecor dalan ing kampunge. Alip ya gandheng lagi bocah kelas loro SD, mung
ngewangi sakbisane, melu njunjung jenangan pasir nganggo ember cilik. Nek
kesel, Alip ya leren sambi ngombe es teh kang diwadhahi ceret sing wis cumepak
ing sandhinge.
Sansaya
awan, srengenge sansaya panas. Ora krasa wis wanci bedhug dhuhur, wayahe
rolasan. Bapak-bapak padha leren, sendhen lesehan ning ngisor wit utawa ning
emperan omah, nyambi ngombe es teh lan nyamik-nyamik cemilan kanggo nambani
kesele. “Bapaaak, Alip pengen mantok.” penjaluke Alip. “Hehe, wis kesel ta kowe
le?” pitakone bapak karo ngguyu nggodha anake. Banjur bapak nggendhong Alip
menyang omah. Tekan omah, Alip langsung dipakpungi karo ibune amarga klambine
pating gloprot reget jenangan pasir garing. Mbarang bar pakpung Alip langsung
turu, ketoke bocah kuwi pancen kekeselen tenan.
“Le,
tangi le, wis sore hlo.” ibu kang nggugah Alip. “Hoooaamm, iyaa bu.” saure Alip
karo angop merga isih ngantuk. “Ibu ameh ning pasar, kowe melu ora le?” krungu
ibu matur ngono, Alip langsung gregah tangi lan pengen melu ibune nyang pasar.
Angen-angene Alip nek melu ning pasar mengko bakal ditumbaske dhawet cendhol senengane dheweke.
Nalika
mlaku menyang pasar Alip crewet banget crita thethek bengek marang ibune.
Pancen bocah kelas 2 SD ki lagi wasis-wasise ngomong, amarga umur semono pancen
lagi masane bocah aktif lan bocah
nduweni rasa pengen ngerti apa-apa banjur nyritakake marang wong liya. “Bu,
mengke tumbas dhawet cendhol ya?” omonge Alip marang ibune. “Nek sore yawis
entek ta thole cah bagus, wis entek dhawet cendhole, bakule wis mantok.” saure
ibu. Krungu ibune matur ngono, Alip rada mbregudul.
Ing
pasar ibu njujug ing bakul jajanan pasar, kang ing kono ana werna-werna jajanan
pasar, kayata dhadhar gulung, semar mendem, lapis, srabi, molen, lsp. “Bu,
nyuwun molene gangsal ewu nggih.” ature ibu marang bakul. “Nggih Bu” wangsulane
yu bakul sambi ngadhahne molen ing plastik. Alip krungu tembung molen bingung
ngukur sirahe. Dheweke mbatin ing atine, mau esuk lagi diweruhi wujud molen dening
bapake, yaiku mesin kang kanggo ngudhak jenangan pasir, nanging saiki ibune
tumbas panganan kok jenenge iya molen. “Molen, jare bapak mesin, tapi saiki ing
pasar kok ibu tumbas molen panganan?” gembrenenge Alip sambi mikar-mikir.
“Bu,
ibu mau tumbas apa?” pitakone Alip. “Iki hlo le, ibu tumbas molen, limang ewu
oleh 10, kowe gelem le?” wangsulane ibu. “Jenenge molen ta bu?” pitakone Alip
sing isih penasaran. “Iyo le, lha piye? semaure ibu. Ibu mbatin kena apa kok
anake leh takon kaya ana rasa ora percaya. Banjur ibu lagi eling menawa Alip
pancen lagi pisan kuwi weruh wujud panganan kang jenenge molen. “Ndhek esuk ing
kerja bhaktian, aku diweruhi bapak mesin kang jenenge molen, Bu. Mesin kuwi isa
mubeng, kanggo ngudhak jenangan pasir. Tapi kok ibu tumbas panganan ing pasar
jenenge padha, Aliph bingung Bu.” jelase Alip. Ibune ya namung mesem krungu
anake ngomong kaya ngono. “Ngene thole cah bagus, pancen jenenge padha, nanging
wujude beda. Ya kuwi mau, mesin kang diweruhi bapak marang kowe kae jenenge
molen, dene panganan iki jenenge ya molen. Iki digawe saka adonan glepung trus jerone diiseni irisan gedhang. Ya iki mujudake
keluwihane basa jawa karo basa liyane, Le. Ing basa Jawa iku ana piranti kang
beda ujude nanging padha jenenge, ya tuladhane molen mau. Nanging uga ana kang
ujude padha nanging anggone ngarani iku beda, yaiku kang diarani dasanama. Maksude
dasanama kuwi, ujude saji nanging jenenge akeh. Tuladhane kanggo nyebut gunung
iku bisa nganggo arga, wukir, giri, ancala, lsp. ngono le.” ibu njlentrehake. Alip
ndomblong ra mudheng dasanama kang dijlentrehake dening ibune. Ibune ya gur
guyu “Hehe, ra usah bingung le, besuk nek kowe wis gedhe bakal diterangake
dening pak guru utawa bu guru, makane sinau sing pinter ben bijine apik trus
munggah kelas ya le.” ature ibu. “Iya bu.” saure Alip karo mesem. “Tapi kowe
wis ra bingung ta perkara molen mau?” pitakone ibu. “Pun mudheng kok bu.
Hehehe..”
Dening
:
Wahyu
Sulistiyaningsih
Pendidikan
Bahasa Jawa FKIP-UNS
Komunitas
“PULPEN IJO” Surakarta
Komentar
Posting Komentar