Apresiasi Geguritan

Kudune Kowe Wis Nangis

Kudune kowe wis nangis

Wineh-wineh piweling kang ko deder ing pelataraning langit

Rajake ora jumbuh karo poncere

Apa kowe iseh wani kandha marang awang-awang

Menawa atose tanganmu wagang mbedang eseme lintang

Apa kowe iseh wani kandha marang Ajisaka

Menawa ha – na – ca – ra – ka selawase bakal nyungging lumite budhaya Jawa

Apa kowe iseh wani nulis tembang kanggo Ranggawarsito

Minangka pratandha menawa sastra Jawa

Selawase tansah kumandhang ing langit wetan

Pancen kudune kowe wis nangis

Jalaran pun cicir anggonmu nengeri

Endi watese kulon lan etan

Apa bedane bengi lan awan

Pancen kudune kowe wis nangis

Jilbab Kuning

Marang jilbab kuning

Esemu nabet gawe seger ati

Katon ngeglo wela-wela yen kowe aleman

Katon gandhes lan pantes tumrap aku kang nyawang

Jilbab kuning, sapa aranmu

Rembulan nanggal las-lasan mesem weruh klidhangmu

Dalan sapecak kang nembe mbok ambah

Njerit nirpati kasulistiyanmu

Kaya dene watu gunung kae, jilbab kuning

Ing kana ana ati kang dumunung sungup

Kepengin ngerti, banjur ngronce endahing alam wadang

Ngronce pangangen kang mumbul ing ngawiyah

Watu kae watu item, jilbab kuning

Ning ya gene, kena tetesane banyumu bisa ajur mumur

Kaya dene lendhut kalen patisan

Impen muspra, lakon mbengkas jagad kasengsaran

Ning iki dudu kodrat keparat

Kasunyatan dadi katresnan edi

Jilbab kuning, aku tresna kowe

1.      Bandingane geguritan “Jilbab Kuning” lan “ Kudune Kowe Wis Nangis” inggih menika wonten ing geguritan “Jilbab Kuning” anggenipun ngucapaken kaganggu kaliyan tembangipun, dadosaken angenipun pelafalan boten radi cetho. Koherensi ukaranipun inggih kirang trep, awrat dipunpahami. Dene geguritan “Kudune Kowe Wis Nangis” tekanan anggenipun ngucapaken geguritan kirang.

2.      Ingkang luwih endah inggih menika “Kudune Kowe Wis Nangis”, kanthi alesan, pamilihaning tembung gampil dipunpahami, surasanipun ugi sae, inggih menika medharaken kasunyatan jaman samenika ingkang sampun owah trap-trapipun, tingkah manungsa ingkang sampun kesupen kaliyan budhaya Jawa ugi boten paring kawigatosan.

3.      Gancaran geguritan “Kudune Kowe Wis Nangis” inggih menika kasunyatan gesang manungsa ingkang sampun nyimpang saking piweling-piweling becik, kahanan sampun boten jumbuh kaliyan poncere. Para manungsa ingkang sami boten paring kawigatosan dhateng budhaya Jawa, ugi manungsa boten ngraosaken gela utawi kuciwa ingkang samesthine kedah sampun nangis awit saking kasunyatan menika. Manungsa sampun kesupen kaliyan tiyang-tiyang ingkang sampun berjasa dhateng budhaya Jawa.

4.      Kaendahan kang wonten ing salebeting geguritan “Kudune Kowe Wis Nangis” inggih menika :

·         Tibaning swanten ing pungkasan saben gatra (guru lagu) kathah kaginaaken, ingkang dadosaken geguritan tansah sakeco dimirengaken. Kados nangis kaliyan langit, awang kaliyan lintang, ajisaka kaliyan Jawa, nangis kaliyan negeri, etan kaliyan awan.

·         Wonten dwi lingga ing sajroning geguritan. Kados wineh-wineh lan awang-awang.

·         Ginaaken majas personifikasi, kados kandha marang awang-awang, lan eseme lintang

·         Ginaaken antonim, kados kulon etan, bengi awan