TEMBANG POCUNG SERAT WEDHATAMA

Serat Wedhatama kadadeyan saka 100 pada tembang macapat, kang kamot ing pupuh tembang Pangkur, Sinom, Pocung, Gambuh, lan Kinanthi. Pupuh tembang kasebut antarane :

                Pupuh Pangkur - 14 pada tembang 

                Pupuh Sinom - 18 pada tembang 

                Pupuh Pocung - 15 pada tembang 

                Pupuh Gambuh - 35 pada tembang 

                Pupuh Kinanthi - 18 pada tembang 

Kang diarani "pupuh tembang" yaiku kumpulaning sawetara tembang macapat kang jinise padha.

Tuladha: Pupuh Pangkur - 14 pada tembang, duweni teges ana 14 tembang kanthi jinis tembang Pangkur, dene Pupuh Sinom - 18 pada tembang tegese ana 18 tembang kang jinise tembang Sinom, lsp.

Tembung "pada" lan "padha" sinaosa namung kacek aksara "h" tegese wis beda. Menawa "pada" yaiku tembang, dene "padha" kuwi ora beda.

Tembang Pocung kang kamot ing sajroning Serat Wedhatama :

PADA 1	Tembang Pocung
	Ngelmu iku, kelakone kanthi laku Lekase lawan kas Tegese kas nyantosani Setya budya pangekese dur angkara
PADA 2	Tembang Pocung
	Angkara gung, neng angga anggung gumulung Gogolonganira Triloka lekere kongsi Yen den umbar ambabar dadi rubeda
PADA 3	Tembang Pocung
	Bada lamun, kang wus sengsem reh ngasamun Semune ngaksama Sasamane bangsa sisip Sarwa sareh saking mardi martatama
PADA 4	Tembang Pocung
	Taman limut, durgameng tyas kang weh limput Karem ing karamat Karana karoban ing sih Sihing sukma ngreda sahardi pengira
PADA 5	Tembang Pocung
	Yeku patut tinulad-tulad tinurut Sapituduhira Aja kaya jaman mangkin Keh pra mudha mudhi diri lapal makna
PADA 6	Tembang Pocung
	Durung becus kesusu selak besus Amaknani rapal Kaya sayid weton Mesir Pendhak pendhak angendhak gunaning jalma
PADA 7	Tembang Pocung
	Kang kadyeku kalebu wong ngaku aku Akale alangka Elok jawane denmohi Paksa langkah ngangkah met kawruh ing Mekah
PADA 8	Tembang Pocung
	Nora weruh, rosing rasa kang rinuruh Lumeketing angga Anggere padha marsudi Kana-kene kaanane nora beda
PADA 9	Tembang Pocung
	Uger lugu, den ta mrih pralebdeng kalbu Yen kabul kabuka Ing drajat kajating urip Kaya kang wus winahya sekar srinata
PADA 10	Tembang Pocung
	Basa ngelmu mupakate lan panemune Pasahe lan tapa Yen satria tanah Jawi Kuna kuna kang ginilut tripakara
PADA 11	Tembang Pocung
	Lila lamun kelangan nora gegetun, Trima yen ketaman Sakserik semeng dumadi Tri legawa nalangsa srah ing bathara
PADA 12	Tembang Pocung
	Bathara gung inguger graning jajantung Jenek Hyang Wisesa Sana pasenedan suci Nora kaya si mudha mudhar angkara
PADA 13	Tembang Pocung
	Nora uwus kareme anguwus uwus Uwuse tan ana Mung janjine muring muring Kaya buta buteng betah anganiya
PADA 14	Tembang Pocung
	Sakeh luput ing angga tansah linimput Linimpet ing sabda Narka tan ana udani Lumuh ala ardane ginawa gada
PADA 15	Tembang Pocung
	Durung punjul ing kawruh kaselak jujul Kaseselan hawa Cupet kapepetan pamrih Tangeh nedya anggambuh mring Hyang Wisesa