Tembang Pangkur Serat Wedhatama

Serat Wedhatama kadadeyan saka 100 pada tembang macapat, kang kamot ing pupuh tembang Pangkur, Sinom, Pocung, Gambuh, lan Kinanthi. Pupuh tembang kasebut antarane :

                Pupuh Pangkur - 14 pada tembang 

                Pupuh Sinom - 18 pada tembang 

                Pupuh Pocung - 15 pada tembang 

                Pupuh Gambuh - 35 pada tembang 

                Pupuh Kinanthi - 18 pada tembang 

Kang diarani "pupuh tembang" yaiku kumpulaning sawetara tembang macapat kang jinise padha.

Tuladha: Pupuh Pangkur - 14 pada tembang, duweni teges ana 14 tembang kanthi jinis tembang Pangkur, dene Pupuh Sinom - 18 pada tembang tegese ana 18 tembang kang jinise tembang Sinom, lsp.

Tembung "pada" lan "padha" sinaosa namung kacek aksara "h" tegese wis beda. Menawa "pada" yaiku tembang, dene "padha" kuwi ora beda.

Tembang Pangkur kang kamot ing sajroning Serat Wedhatama :

PADA 1	Tembang Pangkur
	Mingkar mingkuring angkara akarana karenan mardi siwi sinawung resmining kidung sinuba sinukarta mrih kretarta pakartining ngelmu luhung kang tumrap neng tanah Jawa agama ageming aji
PADA 2	Tembang Pangkur
	Jinejer neng Wedhatama mrih tan kemba kembenganing pambudi mangka nadyan tuwa pikun yen tan mikani rasa yekti sepi asepa lir sepah samun samangsane pasamuan gonyak ganyuk nglelingsemi
PADA 3	Tembang Pangkur
	Nggugu karsaning priyangga nora nganggo peparah lamun angling lumuh ing ngaran balilu uger guru aleman nanging janma ingkang wus waspadeng semu sinamun ing samudana sesadon ingadu manis
PADA 4	Tembang Pangkur
	Si penggung nora nglegawa sangsayarda denira cacariwis ngandhar-andhar angendhukur kandhane nora kaprah saya elok alangka longkanganipun si wasis waskitha ngalah ngalingi marang si pingging
PADA 5	Tembang Pangkur
	Mangkono ngelmu kang nyata sanyatane mung weh reseping ati bungah ingaranan cubluk sukeng tyas yen denina nora kaya si punggung anggung gumrunggung ugungan sadina dina aja mangkono wong urip
PADA 6	Tembang Pangkur
	Urip sepisan rusak nora mulur nalare ting saluwir kadi ta guwa kang sirung sinerang ing maruta gumarenggeng anggereng anggung gumrunggung pindha padhane si mudha prandene paksa kumaki
PADA 7	Tembang Pangkur
	Kikisane mung sapala palayune ngendelken yayah wibi bangkit tur bangsaning luhur lha iya ingkang rama balik sira sarawungan bae durung mring atining tata krama nggon anggon agama suci
PADA 8	Tembang Pangkur
	Socaning jiwangganira jer katara lamun pocapan pasthi lumuh asor kudu unggul semengah sesongaran yen mangkono keno ingaran katungkul karem ing reh kaprawiran nora enak iku kaki
PADA 9	Tembang Pangkur
	Kekerane ngelmu karang kekarangan saking bangsaning gaib iku boreh paminipun tan rumasuk ing jasad amung aneng sajabaning daging kulup yen kapengok pancabaya ubayane mbalenjani
PADA 10	Tembang Pangkur
	Marma ing sabisa-bisa bebasane muriha tyas basuki puruita-a kang patut lan traping angganira ana uga angger ugering kaprabun abon aboning panembah kang kambah ing siyang ratri
PADA 11	Tembang Pangkur
	Iku kaki takonana marang para sarjana kang martapi mring tapaking tepa tulus kawawa nahen hawa wruhanira mungguh sanyataning ngelmu tan mesthi neng janma wredha tuwin mudha sudra kaki
PADA 12	Tembang Pangkur
	Sapantuk wahyuning Allah gya dumilah mangulah ngelmu bangkit bangkit mikat reh mangukut kukutaning jiwangga yen mengkono kena sinebut wong sepuh lire sepuh sepi hawa awas roroning atunggil
PADA 13	Tembang Pangkur
	Tan samar pamoring sukma sinuksmaya winahya ing ngasepi sinimpen telenging kalbu pambukaning warana tarlen saking liyep layaping aluyup pindha pesating sumpena sumusuping rasa jati
PADA 14	Tembang Pangkur
	Sejatine kang mangkana wus kakenan nugrahaning Hyang Widhi bali alaming ngasuwung tan karem arameyan ingkang sipat wisesa winisesa wus mulih mula ulanira mulane wong anom sami